КОНДАК 1

Рождейся от Девы и пение небесное приявый, приими из сокровищ духовных наше возносимое Тебе песнопение: Иисусе, Богомладенче, спаси нас.

ИКОС 1

От Ангелов благовестие приемше, во град Вифлеем духовно вшедше и Младенца в яслях узревши, радостно воспоем Ему:

Иисусе, Ангелов ликование.

Иисусе, сердца моего Взыграние.

Иисусе, всего мира Ожидание.

Иисусе, Небесное Сияние.

Иисусе, Богомладенче, спаси нас.

КОНДАК 2

Живущим верою, путь пастыри указуют, темже с ними и мы ликовствуя, поем рождшемуся: Аллилуиа.

ИКОС 2

Дети Божии радостно Младенцу, лежащему в яслях, поют:

Иисусе, нас ради родивыйся.

Иисусе, на земле явивыйся.

Иисусе, со Отцем не разлучивыйся.

Иисусе, пеленами повивыйся.

Иисусе, Богомладенче, спаси нас.

КОНДАК 3

Еже видети радость Вселенной, устранимся суетного мира и умом своим вертеп и ясли обымем, непрестанно взывая Богу: Аллилуиа.

ИКОС З

Слава в Вышних Богу, Ангелы поют на Небесах, и мы с ними вопием Ти:

Иисусе, Слава Ангелов;

Иисусе, Похвало пастырей;

Иисусе, Сокровище мое;

Иисусе, Бессмертие мое;

Иисусе, Богомладенче, спаси нас.

КОНДАК 4

Трепетно вся тварь ныне радуется, Небеса веселятся, купно с ними и мы вопием спасающему Богу: Аллилуиа.

ИКОС 4

Волхвы звезду узревши во Вифлеем потекоша и обретше Сокровище нетленное, возопиша с верою:

Иисусе, Мудросте вечная.

Иисусе, Истина совершенная.

Иисусе, Богооткровение.

Иисусе, радостей Явление.

Иисусе, Богомладенче, спаси нас.

КОНДАК 5

Облако легкое росу благодатного явления нам дарующая, зрим Невесту Неневестную, Сына - Младенца охраняющую. Емуже вси поем: Аллилуиа.

ИКОС 5

Храмина—убежище бессловесных, явилась палатою Царя всех, да и мы не убоимся, ниже смутимся убожества души своея, но со дерзновением преступим, вопиюще:

Иисусе, вниде в дом убогия души моея.

Иисусе, возлежи в яслях сердца моего.

Иисусе, соделай достойным мя быти храмом Твоим.

Иисусе, покрый мя милосердием Своим.

Иисусе, Богомладенче, спаси нас.

КОНДАК 6

Разгнавый тьму неведения, озари ум мой светом истиннаго Богопознания, да ликуя воспоим: Аллилуиа.

ИКОС 6

И на земли мир, возгласиша Ангелы, познав сие, радостно поем Примирителю:

Иисусе, совести успокоение.

Иисусе, ума просвещение.

Иисусе, от уз греховных разрешение.

Иисусе, с Богом примирение.

Иисусе, Богомладенче, спаси нас.

КОНДАК 7

Слезы Божественного умиления точаще, огласим пещеру Вифлеема сугубым пением: Аллилуиа.

ИКОС 7

Тако возлюбил Бог мир, радостно сию любовь восхвалим, вопиюще:

Иисусе, Любовь предвечная.

Иисусе, Сладосте сердечная.

Иисусе, Милосте бесконечная.

Иисусе, Радосте небесная.

Иисусе, Богомладенче, спаси нас.

КОНДАК 8

От Древа жизни отшедшия, в глубину зол падшия, ныне создание Божие Спасителем восстановляется, Ему же поем: Аллилуиа.

ИКОС 8

Велия Благочестия Тайна — Бог явися во плоти, к Нему все взываем:

Иисусе, Троицы откровение.

Иисусе, Любви проявление.

Иисусе, нераздельное с человеком соединение.

Иисусе, вечное о нас промышление.

Иисусе, Богомладенче, спаси нас.

КОНДАК 9

Обуреваемый житейскими попечениями, с кораблем потопляемый грехами, к тихому пристанищу к Вифлеему притеку, в сии дни радостно воспоим Ти: Аллилуиа.

ИКОС 9

Дары рождшемуся Иисусу приносят вси и аз, недоумением и радостью объятый, в скудности ума моего, принесу песнь сию:

Иисусе, сердце мое обнови.

Иисусе, душу мою спаси.

Иисусе, для вечности сохрани.

Иисусе, пред Отцем Небесным защити.

Иисусе, Богомладенче, спаси нас.

КОНДАК 10

Ум мой наставь и сердце очисти, да с Ангелы чисто воспоем Тебе: Аллилуиа.

ИКОС 10

Христос мой Спаситель, сего ради ликует состав мой о рождении Твоем:

Иисусе, Спасение мое.

Иисусе, Крепосте моя.

Иисусе, Радосте моя.

Иисусе, Богомладенче, спаси нас.

КОНДАК 11

О Тебе радуется душа моя! О Тебе веселится язык мой! И жизнь моя пребывает в святом уповании, егда пою Тебе песнь: Аллилуиа.

ИКОС 11

Множество щедрот Твоих и любви к роду человеческому, сего ради вопием Ти:

Иисусе, вечное Милосердие.

Иисусе, благодатное Озарение.

Иисусе, земли Посетителю.

Иисусе, тайны спасения Совершителю.

Иисусе, Богомладенче, спаси нас.

КОНДАК 12

Пение приносим Тебе, Безначальному Отцу с горними и дольними: Аллилуиа.

ИКОС 12

Одеяйся светом, яко ризою, пеленами ныне повивается, да нас одеждами светлыми украсит воспевающих:

Иисусе, чертог светлый нам уготовляющий.

Иисусе, одеждами брачными нас украшающий.

Иисусе, нетлением венчающий.

Иисусе, красотою духовною нас облекающий.

Иисусе, Богомладенче, спаси нас.

КОНДАК 13 (Трижды)

Юнеет и обновляется всякая душа христианская в светлом празднике Твоего
Рождения, Духом Святым оживляется, Тройческим Единством просвещается и
непрестанно поя песнь: Аллилуиа, Аллилуиа, Аллилуиа.